Zure ibilgailuari krokadurako bola bat jarri nahi badiozu, seguru hainbat galdera etorriko zaizkizula burura: zer egin bola muntatzeko, zein da bola IATan legezkotzeko epea, zein da beharrezko dokumentazioa, etab. Lasai, behar duzun guztia azalduko dizugu eta zure ibilgailuari krokadurako bola bat jartzeko eman beharreko urratsak ere bai.
Krokadurako bola baten instalazioa erreformatzat jotzen da eta IATan izapidetzen diren ohikoenetako bat izaten da, izan ere, Garrantzizko erreformen eskuliburuan adierazten den moduan, ibilgailu bat matrikulatu ondoren ibilgailuan egiten diren aldaketa, ordezkapen, jarduketa, eranste edo kentze guztiak IATan homologatu behar dira. Kasu honetan, eranste bat izango litzateke.
Hori esanda, egin behar duzun lehenengo gauza da lantegiari edo kontzesionarioari galdetzea zeintzuk diren zure ibilgailuak dituen krokadurarako aukerak, bola hauek ibilgailu modelo bakoitzerako homologatuak eta diseinatuak baitaude. Dituzun aukerak ezagutzen dituzunean, zure lehentasunetara hoberen egokitzen dena aukeratzea besterik ez duzu, prezioaren edo krokadura motaren arabera. Garrantzitsua da kontuan izatea krokadurako bola batek ezin duela oztopatu matrikularen plakaren ikusgarritasuna, ez eta argi edo seinalizazio gailuena ere.
Krokadurako bola IATan legezkotzeko, honako dokumentazioa beharko duzu:
- Ibilgailuaren fitxa teknikoa eta zirkulazio baimena.
- Krokadura instalatu duen lantegiaren ziurtagiria.
- Adostasun txostena, krokaduraren fabrikatzaileak edo ibilgailuaren fabrikatzaileak eman ohi duena. Erreforma laborategi ofizial bati ere eska diezaiokezu. Hala ere, normalean, lantegiak arduratzen dira horretaz.
- Krokaduraren muntaketa jarraibideak.
- Krokaduraren homologazio ziurtagiria (CE) edo krokaduraren fabrikazio ziurtagiria (RI), ibilgailu motaren edo haren homologazioaren arabera.
- Titularra bazara, NANa aurkeztu beharko duzu. Titularra ez bazara, IAT gunera hurbiltzen den pertsonak bere NANa eta erreforma izapidetzeko ibilgailuaren titularraren baimena ekarri beharko ditu.
Krokadura instalatzen denetik, 15 eguneko epea egongo da legezkotzeko. Dokumentu hauek IAT gune batean aurkeztu beharko dituzu eta, behin aurkeztuta, ibilgailuaren azterketa teknikoa egiteko eguna eta ordua emango dizkizugu, krokadura jarrita duela. Ez da beharrezkoa ibilgailua IAT gunera ekartzea instalazioaren aurretik. Azterketaren emaitza positiboa bada, dagokion idatzoharra jarriko zaizu ibilgailuaren IAT txartelean.
Kontuan izan krokadurako bola beti agertu behar dela ibilgailuaren fitxa teknikoan, kontzesionarioan bertan instalatzen bada ere ibilgailua erosteko momentuan eta kotxe berria krokadurarekin eramaten baduzu ere.
